Ina Zhupa, deputete e Partisë Demokratike, deklaroi se qeveria po shkel Kushtetutën duke përdorur 4.2 milionë euro nga fondi i emergjencave për një koncert. Sipas saj, ky fond është destinuar për fatkeqësi natyrore si tërmete, përmbytje dhe zjarre, jo për aktivitete private.
Deputetja theksoi se koncerti i artistit ndërkombëtar u prezantua si investim privat dhe duhej të financohej nga organizatorët, përmes shitjes së biletave dhe sponsorizimeve. Ajo shtoi se pas interesit të ulët publik, qeveria ndërhyri me fonde shtetërore.
Zhupa e konsideroi aktin normativ për financimin e koncertit një shkelje të nenit 101 të Kushtetutës, i cili lejon nxjerrjen e akteve të tilla vetëm në raste urgjente. Ajo ngriti shqetësimin se Shqipëria ende vuan nga mungesa në mbrojtjen civile, shërbimet shëndetësore dhe sektorë të tjerë publikë, ku këto fonde do të ishin më të nevojshme.
Zhupa i bëri thirrje Kuvendit të mos miratojë aktin normativ, duke paralajmëruar se krijon një precedent të rrezikshëm për përdorimin e parave të taksapaguesve. Sipas saj, deputetët nuk duhet të bëhen noterë të një vendimi që cenon kuptimin e fondit të emergjencave.