Ditar Kabashi, ligjërues i së drejtës kushtetuese, ka sqaruar afatet për krijimin e institucioneve pas certifikimit të rezultateve të zgjedhjeve parlamentare. Ai thekson se Kushtetuta e Kosovës nuk e kushtëzon zgjedhjen e presidentit me praninë fizike të 80 deputetëve në sallë. Ky kuorum, sipas tij, është interpretim i Gjykatës Kushtetuese, jo kërkesë kushtetuese.
Kabashi vë në dukje se partitë politike e përdorin këtë interpretim si një mekanizëm bllokues. Sipas tij, çështja e kuorumit shfrytëzohet për të penguar procesin, ndonëse nuk është një kërkesë direkte e Kushtetutës.
Pas konstituimit të Kuvendit të Kosovës, fillon afati prej 60 ditësh për zgjedhjen e presidentit. Ky afat u interpretua së fundmi edhe nga Gjykata Kushtetuese. Nëse presidenti nuk zgjidhet brenda këtij afati, vendi shkon në zgjedhje të sërishme brenda 45 ditëve pasuese.
Megjithëse konsensusi është i nevojshëm, Kabashi shprehet se ai nuk nënkupton vetëm heqjen dorë nga njëra palë. Konsensusi kërkon marrëveshje nga të gjitha palët e përfshira.