Kardiologu David Min ka theksuar rëndësinë e konsumimit të frutave për të zvogëluar rrezikun e infarktit, goditjes në tru dhe vdekjes nga sëmundjet kardiovaskulare. Ai veçoi mollët, avokadon, boronicat dhe portokallet si fruta thelbësore për një dietë të shëndetshme për zemrën.
Mollët, të pasura me fibra dhe antioksidantë, lidhen me përmirësimin e tensionit të gjakut dhe uljen e kolesterolit. Avokado, sipas Dr. Min, është një burim i shkëlqyer i acideve yndyrore të pangopura. Këto yndyrna të shëndetshme ulin kolesterolin e keq (LDL) dhe rrisin atë të mirë (HDL).
Boronicat, gjithashtu me shumë antioksidantë dhe fibra, kontrollojnë radikalet e lira, ulin tensionin e gjakut, përmirësojnë elasticitetin e arterieve dhe rrisin HDL. Portokallet, të njohura për vitaminën C, përmbajnë edhe flavanone. Kardiologia Audrey T. Damren shpjegon se flavanonet ulin tensionin, përmirësojnë kolesterolin, zvogëlojnë inflamacionin dhe rregullojnë sheqerin në gjak, të gjithë faktorë të rëndësishëm për uljen e rrezikut të sëmundjeve kardiovaskulare.
Sëmundjet e zemrës shkaktohen nga grumbullimi i yndyrës në arterie, duke ngushtuar enët e gjakut dhe kufizuar rrjedhjen e gjakut drejt zemrës. Faktorët e rrezikut përfshijnë duhanin, tensionin e lartë, kolesterolin e lartë, mungesën e aktivitetit fizik, diabetin, obezitetin dhe historinë familjare. Për të parandaluar këto sëmundje, rekomandohet aktiviteti fizik, mbajtja e peshës së shëndetshme, ndalimi i duhanit, kufizimi i alkoolit dhe kontrolli i tensionit e diabetit.