Aleksandër Koçeku, 40 vjeç, u ekzekutua me breshëri automatiku në fshatin Lin, pranë zonës së Karmës së Kirit në Shkodër. Viktima u gjet në automjetin e tij nga një kalimtar i rastësishëm, i cili njoftoi policinë. Në vendngjarje u sekuestruan 25 gëzhoja automatiku, të gjitha nga e njëjta armë.
Grupi hetimor konstatoi se autorët i kishin zënë pritë Koçekut. Hetimet kryesore janë përqendruar te pista e gjakmarrjes. Familjarët e viktimës deklaruan se dyshojnë se atentati është kryer për gjakmarrje, duke e lidhur atë me vrasjen e Angjelin Shkambit në dhjetor 2017. Vëllai i Aleksandër Koçekut, Artan Koçeku, aktualisht vuan dënimin për këtë vrasje, e cila lidhej me një borxh dhe një çështje nderi.
Aleksandër Koçeku ishte nën hetim edhe për vrasjen e Pavlin Prekës vitin e kaluar. Prokuroria e Shkodrës zgjati afatet e hetimit për këtë çështje pak ditë më parë. Ai dyshohej se ishte përfshirë, bashkë me Vasel Koçekun dhe Klaudio Lisajn, në planifikimin dhe realizimin e vrasjes së 19-vjeçarit Preka në shkurt 2025.
Policia dhe Prokuroria po vazhdojnë hetimet për zbardhjen e plotë të ngjarjes, identifikimin dhe arrestimin e autorëve.