Ursula von der Leyen, presidentja e Komisionit Evropian, theksoi përparimin e Shqipërisë dhe Malit të Zi në negociatat e anëtarësimit gjatë një vizite zyrtare në Irlandë. Ajo mirëpriti mbështetjen e fortë të Irlandës për këtë proces zgjerimi, i cili bazohet në meritën e çdo vendi. Von der Leyen përmendi gjithashtu objektivin për të përfunduar negociatat e pranimit me Malin e Zi deri në fund të vitit.
Presidentja e KE-së kujtoi zgjerimin historik të BE-së në vitin 2004, i cili u realizua gjatë presidencës irlandeze të Këshillit të BE-së. Kryeministri i Irlandës përsëriti mbështetjen e vendit të tij, i cili mban presidencën e radhës së Këshillit të BE-së, për vendet kandidate në rrugën drejt anëtarësimit të plotë.
Shqipëria është në fazën përmbyllëse të negociatave të anëtarësimit, pasi ka përmbushur kriteret e ndërmjetme për grupkapitullin “Themeloret”. Vendi aplikoi për anëtarësim në vitin 2009, mori statusin e vendit kandidat në 2014 dhe hapi zyrtarisht negociatat në 2022. Gjatë procesit, Shqipëria ka hapur të gjashtë grupkapitujt, duke përfshirë kapitujt e fundit për burimet, bujqësinë dhe kohezionin, të hapur në fund të vitit 2025.
Në Konferencën e Tetë të Anëtarësimit në Bruksel, BE konfirmoi plotësimin e kritereve të ndërmjetme në fushën e shtetit të së drejtës, duke kaluar Shqipërinë në fazën e fundit të negociatave. Kryeministri i Shqipërisë, Edi Rama, synon anëtarësimin në Bashkimin Evropian deri në vitin 2030.