Në Viti ka nisur fushata e korrje-shirjeve, ndërsa institucionet komunale kanë nisur monitorimin dhe koordinimin e procesit. Për të ndjekur punimet në terren, është krijuar Komisioni Komunal për Korrje-Shirje. Ky komision siguron zhvillimin e procesit pa pengesa dhe në kushte të sigurta.
Drejtoria për Bujqësi dhe Pylltari njoftoi se këtë vit janë mbjellë rreth 3 mijë hektarë me grurë. Pritshmëritë për rendimente vlerësohen të kënaqshme. Kushtet e favorshme dhe angazhimi i fermerëve pritet të ndikojnë pozitivisht në rezultatet e korrjes.
Mullinjtë dhe grumbulluesit e grurit janë mobilizuar për të siguruar pranimin dhe grumbullimin në kohë të prodhimit. Drejtoria për Bujqësi dhe Pylltari u bëri thirrje qytetarëve dhe fermerëve të tregojnë kujdes. Rreziku nga zjarret është i lartë për shkak të temperaturave. Qytetarët nuk duhet të ndezin zjarre në sipërfaqet me kashtë ose në serra, pasi era dhe temperaturat mund të shkaktojnë përhapje të shpejtë të tyre, duke rrezikuar të mbjellat dhe pronat.
Institucionet komunale do të vazhdojnë monitorimin e fushatës, me synimin që procesi i korrjes së grurit të përfundojë me sukses dhe pa incidente.