Vala e fundit e të nxehtit ekstrem në Gjermani, me temperatura që iu afruan 40 gradë Celsius për ditë të tëra, ka shkaktuar probleme thelbësore në infrastrukturë dhe transport. Në disa qytete si Lajpcig, Esen, Nyrnberg, Würzburg dhe Bremen, transporti publik u ndërpre pasi nxehtësia dëmtoi materialin mes shinave të tramvajit. Probleme të ngjashme u shfaqën edhe në disa autostrada, ku pllakat e betonit pësuan çarje dhe zhvendosje.
Analisti Auron Dodi theksoi se ndikimi i këtyre temperaturave të larta ishte më i thellë sesa mund të shpjegonin disa ditë të nxehta. Edhe sektori i bujqësisë u godit, duke detyruar fermerët të merrnin masa shtesë, si ujitje intensive dhe mbrojtje për pemët, për të ruajtur prodhimin.
Ministri Federal i Mjedisit, Carsten Schneider, paralajmëroi se Gjermania nuk është ende plotësisht e përshtatur për valë të tilla ekstreme të nxehtësisë. Ai bëri thirrje për më shumë gjelbërim në qytete dhe ulje të sipërfaqeve të betonizuara. Ekspertët theksojnë se përshtatja kërkon kohë të gjatë, duke përfshirë dekada, sidomos në bujqësi dhe infrastrukturë. Furnizimi me ujë mbetet një shqetësim i madh, pasi rënia e niveleve të ujërave nëntokësore mund të ndikojë industrinë dhe jetën e përditshme.
Kriza klimatike vë Gjermaninë përballë sfidave të mëdha, ku kostot e mosveprimit janë më të larta se ato të veprimit, sipas ministrit Schneider. Ai bëri thirrje për veprim praktik dhe kompensues, duke theksuar rëndësinë e sektorit të teknologjisë së gjelbër si një shpresë përballë kësaj krize.