Hulumtimi, i zhvilluar nga Universiteti i Sidneyt, analizoi 720 mijë shtrime në spital të personave nën 24 vjeç në Uellsin e Ri Jugor, Australi, gjatë viteve 2001-2022. Rezultatet treguan një lidhje të qartë midis luhatjeve të temperaturës dhe nevojës për kujdes spitalor psikiatrik.
Në ditët me temperatura ekstreme, rreziku i shtrimit në spital për çrregullime të shëndetit mendor dyfishohej gjatë muajve të ngrohtë. Ky rrezik trefishohej gjatë muajve të ftohtë, kur ndodhnin ndryshime të pazakonta të temperaturës. Doktoresha Wen-Qiang He, autore kryesore e studimit, theksoi rëndësinë e informimit të komunitetit për të mbrojtur fëmijët dhe të rinjtë.
Studimi, i publikuar në Journal of the American Academy of Child and Adolescent Psychiatry, përfshiu raste serioze si depresioni, skizofrenia, çrregullimet e të ngrënit, abuzimi me substanca dhe vetëlëndimi. Psikiatrja e adoleshentëve, Cybele Dey, bashkautore e studimit, vuri në dukje se reagimi ndaj rritjes së temperaturave është pothuajse i menjëhershëm, duke sugjeruar një ndikim fiziologjik të nxehtësisë. Temperaturat e larta ndikojnë drejtpërdrejt në funksionin e trurit, ndërsa ndryshimet e papritura të temperaturës prishin gjumin, humorin dhe aftësinë për të menaxhuar stresin.
Studiuesit parashikojnë një rritje prej 6 deri në 7.7 për qind të shtrimeve spitalore të lidhura me temperaturat e larta deri në fund të këtij shekulli, për shkak të ndryshimeve klimatike dhe valëve të të nxehtit.