Strukturat e emergjencës u vunë në lëvizje për të menaxhuar situatën. Erërat e forta shkaktuan rrëzimin e dy pemëve dhe këputjen e degëve në disa vende, duke krijuar rrezik për qarkullimin. Dëmtimi i shtyllës elektrike kërkoi ndërhyrje të menjëhershme.
Ekipet e Agjencisë së Shërbimeve Publike (ASHP) ndërhynë menjëherë për të larguar pemët dhe degët e rrëzuara, duke normalizuar situatën. Paralisht, grupet e punës të OSHEE-s siguruan dhe riparuan shtyllën e dëmtuar të tensionit të mesëm, për të garantuar sigurinë dhe vazhdimësinë e furnizimit me energji elektrike.
Bashkia e Elbasanit u bëri apel qytetarëve të tregojnë kujdes maksimal gjatë stuhive me erëra të forta. Autoritetet lokale theksuan rrezikun nga objektet që mund të shkëputen nga ballkonet apo tarracat e pallateve. Qytetarëve u rekomandohet të shmangin daljet e panevojshme gjatë përkeqësimit të motit, pasi këto fenomene atmosferike janë intensive, por zakonisht zgjasin pak minuta.