Vlerat historike dhe arkitekturore të Gjirokastrës po promovohen përmes arteve të aplikuara. Studentët po rindërtojnë në miniaturë Kalanë e Gjirokastrës, banesat muzeale dhe objekte të tjera të rëndësishme. Këto krijime frymëzohen edhe nga vepra të Ismail Kadaresë, si romani “Kronikë në gur”, që përshkruan arkitekturën e qytetit.
Studentët theksojnë se kjo punë u ka dhënë mundësinë të njohin më mirë Gjirokastrën dhe të përcjellin emocionin e godinave prej guri. Sfida kryesore është riprodhimi realist i strukturës dhe pamjes së gurit, për të transmetuar autenticitetin e arkitekturës gjirokastrite.
Punimet shërbejnë si një mjet promovues për turizmin kulturor, duke ndihmuar vizitorët të njohin historinë, arkitekturën dhe identitetin e Gjirokastrës. Artistët synojnë të nxjerrin në pah elementet karakteristike dhe pasurinë kulturore të qytetit. Gjirokastra, pjesë e Listës së Trashëgimisë Botërore të UNESCO-s që nga viti 2005, mbetet një destinacion i rëndësishëm turistik në Shqipëri.