Klodian Braho, drejtues i SPAK, detajoi raportin vjetor të institucionit për vitin 2025 dhe hapat konkretë për përmbushjen e rekomandimeve të Kuvendit. Ai theksoi ngritjen e një grupi pune për analizën e grupeve të krimit të organizuar, si dhe krijimin e një grupi ndërinstitucional që përfshin institucionet me informacion mbi grupet kriminale.
Aktualisht, po përgatitet Vlerësimi Strategjik i Kërcënimit nga Krimi i Organizuar, i cili do të bëhet publik brenda vitit. Ky dokument do të analizojë karakteristikat, veprimet, shtrirjen dhe lidhjet e grupeve kriminale me pastrimin e parave dhe korrupsionin.
SPAK ka ngritur gjithashtu një grup pune për analizën e masave të sigurimit për periudhën 2021–2025. Ky proces synon vlerësimin e standardit të kërkesave të prokurorisë dhe vendimmarrjen e gjykatave.
Në lidhje me veprat penale zgjedhore, SPAK ka regjistruar mbi 150 procedime penale gjatë periudhës 2021–2025. Vetëm për zgjedhjet e 11 majit 2025, janë administruar 194 materiale dhe janë regjistruar 46 procedime. Një grup pune, me asistencën e OSBE-së, po finalizon analizën e Strategjisë për Hetimin dhe Parandalimin e Krimeve Zgjedhore, në bashkëpunim me Prokurorinë e Përgjithshme dhe KQZ.
SPAK po vlerëson instrumente për të rritur kapacitetin e gjurmimit të pasurive dhe rrjeteve financiare, duke përfshirë përdorimin e teknologjive të avancuara, si analiza e të dhënave digjitale dhe teknologjia blockchain. Kjo kërkon fuqizimin e hetuesve financiarë dhe zgjerimin e aksesit në databaza shtetërore. Një grup pune i posaçëm po punon për unifikimin dhe standardizimin e metodologjive hetimore.
SPAK ka miratuar Strategjinë për Reduktimin e Çështjeve të Mbartura 2025–2027, e cila ka dhënë rezultate konkrete në reduktimin e çështjeve të vjetra. Institucioni ka konsoliduar Sistemin e Menaxhimit të Çështjeve, me synim funksionalitetin e plotë deri në vitin 2026. Byroja Kombëtare e Hetimit (BKH) po përgatitet të hapë garën për 40 hetues të rinj, si pjesë e riorganizimit për t'iu përgjigjur sfidave të hetimit modern.
Braho theksoi gjithashtu se bashkëpunimi ndërkombëtar mbetet prioritet, duke qenë thelbësor në luftën kundër krimit të organizuar ndërkufitar, pastrimit të parave dhe korrupsionit.