Operacioni për shuarjen e zjarrit, i nisur mbrëmjen e së premtes pranë lagjes “Sakë”, përfundoi suksesshëm. Gjashtë automjete zjarrfikëse u angazhuan, ndërsa ndërhyrja u mbështet edhe nga ajri me helikopter. Terreni i vështirë dhe era e fortë nuk penguan punën e forcave në terren.
Policia identifikoi dhe arrestoi Bashkim Alijan, 57 vjeç, banues në Shëngjin. Ai dyshohet se më 3 korrik 2026, në zonën “Sakë”, ndezi zjarr për djegien e mbeturinave pranë subjektit të tij tregtar. Flakët dolën jashtë kontrollit, duke përfshirë një sipërfaqe të madhe pyjore në malin e Shëngjinit.
Gjatë këqyrjes së vendit të ngjarjes u konstatua se i dyshuari kishte hequr DVR-në e subjektit të tij, me qëllim pengimin e zbulimit të së vërtetës. Për shkak të zjarrit, një gur ra dhe plagosi lehtë një pasagjer në një automjet që lëvizte në aksin Lezhë–Shëngjin.
Alija u arrestua për veprat penale “Shkatërrimi i pronës nga pakujdesia”, “Veprime që pengojnë zbulimin e së vërtetës”, “Shkatërrimi nga pakujdesia me zjarr i pyjeve dhe mjedisit pyjor”, si dhe “Plagosje e lehtë nga pakujdesia”.