Administrata e Sigurisë së Transportit (TSA) njoftoi se ndalohet çdo aktivitet fluturues, përfshirë dronët, brenda një rrezeje prej tre miljesh detare dhe deri në 914 metra lartësi rreth stadiumeve në ditët e ndeshjeve. Kjo vlen nëse nuk ka autorizim të posaçëm nga kontrolli i trafikut ajror.
Byroja Federale e Hetimit (FBI) bëri të ditur se dronë janë sekuestruar në hapësira ajrore të kufizuara në të 11 qytetet amerikane që presin ndeshjet e Kupës së Botës. Vetëm në Miami u sekuestruan 130 dronë, ndërsa në Dallas mbi 70, gjatë pesë ndeshjeve.
Administrata Federale e Aviacionit (FAA) ka ndaluar fluturimet e dronëve edhe mbi zonat e grumbullimit të tifozëve. Në këto zona, kufizimi zbatohet brenda një rrezeje prej një milje detare dhe deri në 305 metra lartësi.
FBI paralajmëron se operatorët e dronëve pa autorizim mund të përballen me gjoba deri në 100 mijë dollarë, ndjekje penale dhe sekuestrim të pajisjes. Ekipe të specializuara të FBI-së janë vendosur pranë stadiumeve për të identifikuar dhe neutralizuar dronët e paautorizuar. Javën e kaluar, u ngritën akuza ndaj Cristobal Torres Alvarez, 40 vjeç, i cili dyshohet se fluturoi një dron pranë stadiumit në Dallas.
Incidentet me dronë gjatë aktiviteteve të mëdha sportive janë regjistruar shpesh. Në vitin 2025, një person u shpall fajtor për shkelje të hapësirës ajrore të mbrojtur pas fluturimit të një droni mbi një ndeshje të NFL-së në Baltimore.