Samiti i këtij viti pritet të përqendrohet te përparimi drejt objektivave të shpenzimeve të mbrojtjes, rritjes së prodhimit të industrisë së mbrojtjes dhe transferimit të barrës nga SHBA-ja te Evropa. Qëllimi kryesor është forcimi i mbrojtjes së kontinentit nga vetë shtetet evropiane. Zyrtarët presin që liderët evropianë të dëshmojnë plotësimin e zotimit për të shpenzuar 5% të PBB-së për mbrojtjen deri në vitin 2035.
Sipas një draft-deklarate, aleatët evropianë dhe Kanadaja kanë rritur tashmë investimet në mbrojtje me mbi 139 miliardë dollarë në vitin 2025, duke synuar një Evropë më të fortë brenda një NATO-je të modernizuar. Anëtarët e NATO-s do të rikonfirmojnë mbështetjen për Ukrainën, duke premtuar 70 miliardë euro në pajisje ushtarake, ndihmë dhe trajnime për vitin 2026, me një angazhim të ngjashëm për 2027-ën. Kjo përfshin edhe një linjë kredie të BE-së prej 60 miliardë eurosh. SHBA nuk pritet të kontribuojë me fonde direkte.
Një forum i industrisë së mbrojtjes do të mbahet gjithashtu, ku priten kontrata me vlerë dhjetëra miliarda dollarë. Çështja e Iranit dhe pakënaqësia e Presidentit Trump me qeveritë evropiane pritet të diskutohen. Liderët do të theksojnë se Irani nuk duhet të zotërojë armë bërthamore dhe do t'i bëjnë thirrje Teheranit të respektojë lirinë e lundrimit në Ngushticën e Hormuzit.
Në prag të samitit, protesta kundër NATO-s u zhvilluan në Ankara, organizuar nga Partia Komuniste e Turqisë. Autoritetet turke ndaluan më shumë se 100 persona, ndërsa forcoi masat e sigurisë, vendosi barrikada dhe mbylli rrugë në shumë pjesë të qytetit.