Parlamenti Evropian vërejti progres të moderuar në reformën e administratës publike dhe transformimin digjital, pavarësisht përpjekjeve legjislative. Raporti thekson se zbatimi praktik i reformave mbetet i kufizuar, duke mos prodhuar rezultate të dukshme për qytetarët, veçanërisht në nivel lokal. Nevojiten reforma më të thella dhe forcim i kapaciteteve administrative, përmes zbatimit të plotë të Strategjisë së Administratës Publike 2023–2030.
Ministri i Administratës Publike, Goran Minçev, përmendi si arritje miratimin e Ligjit për drejtuesit e lartë. Ky ligj vendos një sistem të ri për përzgjedhjen e sekretarëve shtetërorë, drejtorëve dhe zëvendësdrejtorëve përmes konkurseve publike dhe kritereve profesionale të bazuara në kompetencë, përvojë dhe integritet. Ai shtoi se ligji parashikon shpallje publike, verifikim të kushteve dhe përzgjedhje të kandidatëve më të mirë, duke lidhur pozitat e larta me dijen dhe integritetin.
Megjithatë, Parlamenti Evropian thekson se depolitizimi i administratës publike mbetet i papërfunduar në praktikë. Ai kërkon zbatim të plotë të parimit të meritokracisë, sidomos në emërimet e nivelit të lartë, për të reduktuar ndikimin politik në administratë. Sipas raportit, nevoja për depolitizim të mëtejshëm dhe zbatimi i plotë i procedurave të rekrutimit bazuar në meritë, në përputhje me standardet e Bashkimit Evropian, janë thelbësore.
Qeveria ka miratuar ligje të reja për përmirësimin e përzgjedhjes dhe trajnimit të nëpunësve, si dhe përditësimin e kuadrit ligjor për dokumentet elektronike. Sfidat përfshijnë mungesën e interesit të të rinjve për punësim në administratë për shkak të pagave jo konkurruese, besimin e ulët publik te institucionet shtetërore dhe zbatimin e mangët të strategjive të reformës. Progresi në menaxhimin e burimeve njerëzore dhe organizimin e administratës mbetet i ngadaltë, me boshllëqe strukturore.