Kryeministri Edi Rama ka deklaruar se protesta e mbajtur një natë më parë në Tiranë, e 34-ta në radhë, ishte devijuar nga qëllimi i saj fillestar. Përmes një postimi në Facebook, Rama u shpreh mirënjohës për 'dritën e shpresës dhe të alarmit' të ndezur nga energjia paqësore e protestuesve, por shtoi se protesta 'nuk është më e juaja, të dashur flamingo'.
Rama krahasoi arkivolin e përdorur në protestë me atë të Azem Hajdarit 28 vjet më parë, të sjellë pranë Kryeministrisë nga Sali Berisha. Ai argumentoi se protesta filloi si shprehje e ndjenjave të sinqerta, por u mor nën kontroll nga 'duar të stërvitura armiqsh e dashakëqinjsh të shoqërive demokratike', të cilët synonin 'të ndalin Shqipërinë dhe ta kthejnë së prapthi'.
Kryeministri theksoi se ky devijim u ndihmua edhe nga 'zellja e sallahanëve' dhe 'ujqit e lodhur të Rrugës së Shpresës', si dhe nga 'çakenjtë e diasporës' nga Prishtina dhe Tetova, të cilët, sipas tij, e panë bulevardin si një vatër për 'benzinën e urrejtjes' ndaj Tiranës zyrtare. Rama e cilësoi Tiranën si 'kryeqytetin e Europës së Ballkanit', jo si një qendër për 'iluzione nacional-komuniste, nacional-islamiste apo nacional-izolacioniste'.
Ai përfundoi mesazhin duke u bërë thirrje protestuesve të mos heqin dorë nga kujtesa, pasi 'historia është busulla që nuk na lejon të humbasim rrugën tonë'.