Incidenti ndodhi rreth orës 19:00 sipas kohës lokale, afër kryqëzimit të East 43rd Street me First Avenue. Pamjet e publikuara treguan burrin duke vendosur fillimisht në trotuar një flamur të lidhur me qeverinë tibetiane në mërgim, para se të kryente aktin e vetëflijimit.
Burri u transportua me urgjencë në Spitalin Bellevue dhe ndodhet në gjendje kritike. Autoritetet gjetën në vendngjarje dokumente me mbishkrimin “Kina jashtë Tibetit”. Policia ka nisur hetimet për të zbardhur rrethanat e plota të incidentit.
Flamuri i përdorur në protestë lidhet me kryengritjen e dështuar tibetiane të vitit 1959. Pas kësaj ngjarjeje, u krijua parlamenti tibetian dhe qeveria në mërgim në Indinë veriore. Kina mori nën kontroll Tibetin në vitin 1951, duke e cilësuar këtë veprim si “çlirim paqësor”. Pekini nuk e njeh administratën tibetiane në mërgim, duke këmbëngulur se Tibeti ka qenë pjesë e Kinës që nga shekulli i 13-të. Nga ana tjetër, Dalai Lama ka deklaruar se Tibeti ishte një shtet i pavarur në kohën kur Ushtria Çlirimtare Popullore Kineze hyri në rajon.