Protestuesit pritet të mblidhen sërish pasdite në bulevard, duke vijuar atë që konsiderohet protesta më e gjatë e viteve të fundit. Fillimisht nisur si reagim ndaj projektit në Zvërnec, kjo lëvizje është zgjeruar duke kërkuar largimin e kryeministrit Edi Rama dhe ndryshimin e sistemit politik.
Gjatë protestës së djeshme, qytetarët përsëritën thirrjet si “Rama jepe dorëheqjen” dhe “Rama ik”. Organizatorët deklaruan se tubimet do të vazhdojnë çdo ditë derisa të arrihet largimi i kryeministrit.
Në podium u mbajtën fjalime nga aktivistë dhe qytetarë. Nëna Liza kërkoi dorëheqjen e kryeministrit, ndërsa një tjetër protestuese theksoi rëndësinë e ruajtjes së karakterit paqësor të lëvizjes. Një moment emocional ishte fjala e nënës së aktivistit Arbër Lleshaj, e cila foli për arrestimin dhe dhunimin e të birit gjatë protestave të javës së kaluar, duke deklaruar vendosmërinë për të vijuar protestën çdo ditë.
Organizatorët kanë theksuar se tubimet do të vazhdojnë edhe në ditët në vijim.