Projekti i resortit parashikon ndërtimin e një kompleksi turistik në zonën e mbrojtur të Zvërnecit dhe zhvillimin e ishullit të Sazanit. Protestuesit argumentojnë se ky projekt rrezikon ekosistemin, veçanërisht lagunën që është habitat dhe pikë migrimi për flamingot rozë dhe specie të tjera shpendësh.
Demonstruesit marshuan drejt Kryeministrisë me pankarta ku shkruhej “Shqipëria nuk është në shitje” dhe figura gjigante të flamingove. Një grup solli simbolikisht edhe një tortë prej betoni, në referencë me ditëlindjen e kryeministrit Edi Rama.
Kjo lëvizje ka fituar vëmendje ndërkombëtare, duke u shndërruar në simbol të pakënaqësisë ndaj menaxhimit të investimeve strategjike dhe mungesës së transparencës qeveritare. Çështja ka mbërritur në institucionet evropiane, ku eurodeputetja holandeze Tineke Strik, udhëheqëse e një komisioni hetimor të Parlamentit Evropian për Shqipërinë, paralajmëroi se negociatat e anëtarësimit në BE mund të ndikohen nëse nuk respektohen standardet mjedisore.
Strik theksoi se ndërtimi i një kompleksi të tillë në zonë të mbrojtur përbën rrezik serioz dhe i bëri thirrje qeverisë shqiptare të rishqyrtojë projektin, duke vlerësuar procesin e integrimit evropian si prioritet. Projekti, me vlerë rreth 4.6 miliardë dollarë, është kundërshtuar që prej prezantimit në vitin 2024. Vala e fundit e protestave nisi pas vendosjes së gardheve dhe hyrjes së makinerive të ndërtimit në zonën bregdetare në fund të majit.