Tirana u bë sërish qendër e protestës qytetare, që shënoi ditën e 37-të radhazi. Qindra qytetarë, aktivistë të shoqërisë civile dhe përfaqësues nga diaspora u mblodhën në Bulevardin “Dëshmorët e Kombit”. Kërkesa kryesore mbetet dorëheqja e menjëhershme e kryeministrit Edi Rama dhe rrëzimi i kabinetit qeveritar.
Pas fjalimeve, protestuesit marshuan nëpër disa prej rrugëve kryesore të Tiranës, duke shkaktuar paralizim të qarkullimit. Gjatë marshimit, thirrjet kundër mazhorancës dhe institucioneve qeveritare ishin konstante. Itinerari i protestës përfundoi sërish përpara Kryeministrisë, ku qytetarët përsëritën në kor thirrjen për dorëheqjen e Ramës.
Organizatorët theksuan se protesta nuk do të tërhiqet. Ata paralajmëruan vazhdimin e marshimeve në ditët në vijim, pa asnjë lloj tërheqjeje, deri në përmbushjen e plotë të kërkesave politike dhe shoqërore.