Irlanda, në programin e saj për Presidencën e Këshillit të BE-së në vitin 2026, thekson tri prioritete kryesore: konkurrueshmërinë, vlerat dhe sigurinë. Zgjerimi i Bashkimit Evropian renditet si një proces i rëndësishëm, mirëpo Maqedonia e Veriut nuk përmendet specifikisht si objektiv prioritar.
Në kuadër të zgjerimit, vëmendje më e madhe i kushtohet Malit të Zi, me synimin për përmbylljen e negociatave të anëtarësimit. Gjithashtu, Shqipëria përmendet për nevojën e progresit të konsiderueshëm në negociata. Ukraina dhe Moldavia trajtohen në një kontekst gjeopolitik, ku zgjerimi lidhet me sigurinë dhe stabilitetin evropian. Maqedonia e Veriut mbetet pjesë e procesit të përgjithshëm të zgjerimit, pa një theks të posaçëm në këtë fazë.
Në planin ekonomik, konkurrueshmëria është prioritet kryesor i BE-së. Kjo synon rritjen e produktivitetit, forcimin e tregut të brendshëm dhe lehtësimin e investimeve. Iniciativa “Një Evropë, Një Treg” synon heqjen e barrierave tregtare. Fokusi është edhe te thjeshtimi i rregullave, inovacioni, digjitalizimi, inteligjenca artificiale dhe tranzicioni energjetik.
Programi i Presidencës irlandeze thekson rëndësinë e mbrojtjes së demokracisë, sundimit të ligjit dhe të drejtave të njeriut. Në fushën e sigurisë, prioriteti i jepet luftës në Ukrainë, konflikteve në Lindjen e Mesme dhe kërcënimeve kibernetike. BE-ja synon të forcojë kapacitetet mbrojtëse dhe bashkëpunimin me partnerët ndërkombëtarë.
Në program thuhet se objektivat janë ambicioze dhe kërkojnë bashkëpunim nga të gjitha shtetet anëtare dhe institucionet e BE-së, në interes të çdo qytetari dhe biznesi.