Misioni i OSBE-së në Kosovë ka publikuar të mërkurën një raport mbi monitorimin e gjykimit të rasteve të krimeve të luftës. Ky raport thekson se sigurimi i dëshmitarëve dhe provave nga jashtë Kosovës vazhdon të jetë një pengesë serioze. Ndër gjetjet kryesore janë edhe vonesat për shkak të mosparaqitjes së dëshmitarëve dhe ndryshimet në përbërjen e trupave gjykuese.
Gerard McGurk, shefi i misionit të OSBE-së në Kosovë, theksoi se rreth një e pesta e seancave shtyhen për shkak të mungesës së dëshmitarëve. Një e katërta e rasteve shtyhen nga ndryshimi i panelit gjyqësor, ndërsa vonesat në zbulimin e provave ose në përkthim kanë shtyrë gjysmën e këtyre rasteve. Raporti vëren gjithashtu mangësi në individualizimin e akuzave, sidomos në rastet me shumë të akuzuar apo forma kolektive përgjegjësie.
Raporti identifikon se sfidat me provat ndikojnë ende në drejtësinë e gjykimit, duke vënë në dukje mbështetjen e përsëritur tek deklaratat e mëparshme të regjistruara, ndonëse dëshmia e drejtpërdrejtë preferohet. Mungesa e bashkëpunimit rajonal dhe shqetësimet për sigurinë e dëshmitarëve, së bashku me përdorimin e kufizuar të alternativave si videolidhja, ndikojnë në ndjekje dhe mbrojtje. Transportimi i të akuzuarve të paraburgosur paraqet gjithashtu një problematikë, shpesh duke shkaktuar shtyrje seancash.
Nga ana tjetër, Ngadhnjim Arrni, kryetar i Gjykatës Themelore në Prishtinë, deklaroi se Departamenti Special, i cili trajton krimet e luftës, po përballet me mungesë gjyqtarësh. Zëvendësministri në detyrë i Drejtësisë, Genc Nimoni, vlerësoi raportin, duke theksuar themelimin e Institutit për Dokumentimin e Krimeve të Luftës dhe ndryshimet në Kodin Penal. Raporti gjithashtu thekson disa zhvillime pozitive, përfshirë rritjen e përfshirjes së institucioneve gjyqësore dhe numrin në rritje të rasteve të përfunduara.