Stresi nga nxehtësia përfshin reagimet e para të trupit ndaj temperaturave të larta gjatë aktivitetit fizik. Simptomat kryesore janë skuqja e lëkurës, ngërçet muskulore, marramendja dhe ndjesia e të fiktit. Trupi përpiqet të ftohet përmes djersitjes, por mekanizmat mund të mbingarkohen. Rekomandohet ndërprerja e aktivitetit, qëndrimi në hije dhe pirja e ujit me gllënjka të vogla. Pijet me elektrolite mund të ndihmojnë në rast ngërçesh.
Lodhja nga nxehtësia ndodh kur trupi humb sasi të mëdha uji dhe kripërash për shkak të djersitjes së tepërt. Simptomat përfshijnë të përziera, të vjella, dobësi fizike, dhimbje koke të forta, acarim, lëkurë të ftohtë e të lagësht dhe temperaturë të lartë trupore. Në raste të rënda mund të ndodhin dëmtime të organeve, sidomos veshkave. Personi duhet të zhvendoset menjëherë në një vend të freskët ose me ajër të kondicionuar dhe të konsumojë lëngje. Kërkohet ndihmë mjekësore urgjente nëse gjendja nuk përmirësohet.
Sulmi nga nxehtësia është gjendja më e rrezikshme dhe konsiderohet emergjencë mjekësore. Kjo ndodh kur trupi nuk arrin më të rregullojë temperaturën, e cila kalon mbi 40°C dhe djersitja ndalon. Organet fillojnë të dështojnë. Simptomat përfshijnë humbjen e vetëdijes, konfuzionin, krizat ose delir. Temperatura trupore rritet shpejt dhe pa trajtim urgjent, mund të çojë në dëmtime të përhershme ose vdekje. Ekspertët theksojnë se në rast dyshimi për sulm nga nxehtësia, duhet thirrur menjëherë urgjenca dhe personi duhet të ftohet sa më shpejt të jetë e mundur.