Zëvendëskryeministri dhe ministri i Transportit, Aleksandar Nikolloski, deklaroi se ndryshimet ligjore po bëhen në bashkëpunim me Ministritë e Punëve të Brendshme dhe Vetëqeverisjes Lokale, si dhe në koordinim me Delegacionin e Bashkimit Evropian.
Ministria po punon për instalimin e sistemeve të mençura transportuese në Korridorin 10. Projekti financohet me një grant prej 13 milionë eurosh nga mekanizmi për mbështetje të Ballkanit Perëndimor, në bashkëpunim me Bankën Botërore. Procesi me këto institucione është afër përfundimit. Nikolloski njoftoi se do të punohet edhe në Korridorin 8.
Për Korridorin 10, Ministria ka shpallur tenderin për zgjedhjen e kontraktorit, me gjashtë kompani të huaja që kanë paraqitur oferta. Dokumentacioni projektues përfshin sisteme për kontrollin e peshës së automjeteve gjatë lëvizjes (WIM), monitorimin e automjeteve që transportojnë lëndë të rrezikshme (HAZMAT) dhe matjen e ndotjes së ajrit përgjatë Autostradës A1 (E75).
Gjithashtu, po punohet për krijimin e një qendre kombëtare për menaxhimin e komunikacionit (NCUS), e cila do të mbikëqyrë dhe menaxhojë trafikun në të gjitha rrugët shtetërore dhe do të ofrojë informacione për përdoruesit e korridoreve. NCUS do të vendoset në kuadër të Ndërmarrjes Publike për Rrugë Shtetërore në Petrovec.
Sistemet inteligjente pritet të përmirësojnë shërbimet transportuese, të ofrojnë informacione në kohë reale për udhëtimin dhe sigurinë, duke reduktuar kohën e udhëtimit dhe emetimet e gazrave të dëmshme.