Marrëveshja u firmos nga Fatih Turkmenoglu, drejtor i Bankës Evropiane për Rindërtim dhe Zhvillim (BERZH), dhe Koce Trajanovski, drejtor i Ndërmarrjes Publike për Rrugë Shtetërore. Ky projekt merr një grant prej 30.8 milionë eurosh dhe një kredi prej 167.6 milionë eurosh.
Drejtori Trajanovski deklaroi se punimet do të fillojnë në muajin gusht të këtij viti. Periudha e parashikuar e ndërtimit është katër vjet. Projekti përfshin ndërtimin e pesë tuneleve me dy gypa, me gjatësi totale rreth 5 kilometra, nëntë urash me gjatësi 2.5 kilometra, 11 mbikalimesh, katër galerish për stabilizimin e pjerrësisë, secila 1 kilometër, si dhe nëntë muresh mbajtëse.
Fatih Turkmenoglu i BERZH-it e vlerësoi projektin si të rëndësishëm për vendin. Ai theksoi se autostrada përmirëson lidhjen rajonale, veçanërisht me Kosovën, dhe mbështet rritjen ekonomike duke krijuar vende pune. Kryeministri Hristijan Mickoski shtoi se projekti, i premtuar prej vitesh, po realizohet me financimin e siguruar, kontraktorin e zgjedhur dhe fillimin e aktiviteteve në terren.