Grupi parlamentar i VMRO-DPMNE-së pret që LSDM dhe BDI të shprehin qëndrimet e tyre mbi propozimin për votimin me postë për diasporën. Ky propozim parashikon rregullimin e procedurës me një akt nënligjor, të miratuar nga Komisioni Shtetëror i Zgjedhjeve (KSHZ) deri më 30 shtator 2028. VMRO-DPMNE ka deklaruar gatishmërinë për të pranuar një njësi të vetme zgjedhore si pjesë e një marrëveshjeje politike më të gjerë.
Partia Levica kërkon kompromis dhe një njësi të vetme zgjedhore. Lideri i saj, Dimitar Apasiev, ka theksuar se është i gatshëm për një marrëveshje politike vetëm nëse miratohet ky model dhe rregullohet financimi i reklamave politike me pagesë.
Nga ana tjetër, LSDM ka refuzuar votimin elektronik dhe po kundërshton votimin me postë pa mekanizma të mjaftueshëm kontrolli dhe sigurie. Partia thekson se nuk është kundër votimit të diasporës, por kundër modeleve që nuk garantojnë siguri, transparencë dhe mbrojtje të vullnetit zgjedhor. LSDM kërkon që KSHZ-ja të rregullojë këto procedura me konsensus.
Kryeministri Hristijan Mickoski shprehu shpresën se mosmarrëveshjet me opozitën do të tejkalohen dhe se një zgjidhje mund të gjendet deri më 15 korrik. Ai theksoi se Qeveria dhe VMRO-DPMNE janë të gatshme të pranojnë një njësi të vetme zgjedhore, si dhe kërkesat e Levicës për fonde shtesë për partitë më të vogla, nëse kjo do të ndihmonte në miratimin e Kodit të ri Zgjedhor.
Sipas informacioneve paraprake, grupi i punës ka arritur pajtueshmëri për modelin e shpërndarjes së fondeve buxhetore për zgjedhjet. Kodi Zgjedhor nuk do të jetë pjesë e ligjeve reformuese për raportin e 15 korrikut drejtuar Komisionit Evropian, siç njoftoi kryeministri Mickoski. Grupi i punës për reformën e Kodit Zgjedhor u formua më 3 mars të këtij viti.