Në prag të vizitës së saj në Shkup, Eurokomisionerja për Zgjerimin dhe Politikën e Fqinjësisë, Marta Kos, dërgoi një mesazh të qartë për Maqedoninë e Veriut. Ajo theksoi se vendi ndodhet përballë një mundësie historike për afrim me Bashkimin Evropian, por ky përparim varet nga përmbushja e detyrimeve të marra përsipër.
Kos theksoi se procesi i zgjerimit po hyn në një fazë të re. Vendet që zbatojnë reformat dhe respektojnë obligimet e tyre, si Mali i Zi dhe Shqipëria, po avancojnë më shpejt drejt anëtarësimit. Sipas saj, stanjacioni në këtë moment përshpejtimi do të thotë prapakthim.
Maqedonia e Veriut ka shënuar progres të rëndësishëm në zbatimin e Agjendës së Reformave të Planit të Rritjes për Ballkanin Perëndimor. Komisioni Evropian do të orientojë financime shtesë drejt vendeve me rezultate më të mira reformuese. Logjika e mbështetjes financiare është e thjeshtë: sa më shumë reforma, aq më shumë mbështetje.
Eurokomisionerja iu përgjigj qëndrimit të qeverisë se nuk do të pranojë ndryshime kushtetuese pa garanci. Ajo shpjegoi se asnjë vend kandidat nuk ka marrë garanci se gjatë procesit të anëtarësimit nuk do të paraqiten çështje të tjera. Garancia më konkrete për Maqedoninë e Veriut është ajo e përcaktuar tashmë në Kornizën Negociuese.
Pas miratimit të ndryshimeve kushtetuese, do të mbahet konferenca e ardhshme ndërqeveritare. Ky hap do t'i bashkojë Maqedoninë e Veriut me vendet udhëheqëse si Mali i Zi, Shqipëria, Moldavia dhe Ukraina. Kos theksoi gjithashtu nevojën për të gjetur mënyra të reja për integrimin e vendeve kandidate para anëtarësimit, siç janë pjesëmarrja në SEPA dhe programi Erasmus+.