Lutjet mortore për ish-udhëheqësin suprem të Iranit, ajatollahun Ali Khamenei, u zhvilluan më 5 korrik, katër muaj pas vrasjes së tij. I pranishëm nuk ishte udhëheqësi aktual, Mojtaba Khamenei.
Ajatollahu i Madh Ja’far Sobhani udhëhoqi ceremoninë. Tradita iraniane parashikon që pasardhësi të drejtojë lutjet mortore, rol që analistët e konsiderojnë si forcues të legjitimitetit. Mungesa e Mojtabës ngre pikëpyetje për gjendjen e tij shëndetësore dhe aftësinë për të kryer detyrat si udhëheqës suprem.
Mojtaba nuk është parë në publik që nga 28 shkurti, kur u raportua se u plagos në të njëjtin sulm që vrau babanë e tij. Asnjë incizim audio apo video i tij nuk është publikuar që atëherë. Autoritetet iraniane mund të justifikojnë mungesën me shqetësime për sigurinë. Megjithatë, prania e pothuajse të gjithë zyrtarëve të lartë të Republikës Islamike sugjeronte besim tek masat e sigurisë.
Në ceremoni ishin të pranishëm drejtuesit e tri degëve të pushtetit, komandantët e Gardës Revolucionare Islamike (IRGC) dhe oficerë të lartë të Forcës Quds të IRGC-së. Tre djemtë e tjerë të Ali Khameneit – Mostafa, Masud dhe Meysam – gjithashtu morën pjesë.
Më 3 korrik, presidenti amerikan Donald Trump deklaroi se Uashingtoni i kishte dhënë Teheranit “një javë pushim” për zhvillimin e ceremonive mortore, para rifillimit të negociatave indirekte për marrëveshjen e paqes.