Transferimi i fundit, prej 148.6 milionë denarësh ose 2.4 milionë eurosh, rrit shumën totale të mjeteve të vendosura në ekonomi për investime në 14.5 miliardë denarë, ose 235.8 milionë euro. Buxheti i përgjithshëm i parashikuar për mbështetjen e kompanive vendore arrin në 250 milionë euro, me një vlerë investimi prej rreth 300 milionë eurosh.
Mjetet, të siguruara nga Qeveria, ofrohen për kompanitë vendore me kushte të favorshme. Ato shpërndahen tek përfituesit përfundimtarë përmes bankave komerciale. Norma e interesit është 1.95 për qind në vit. Afati i kthimit është deri në 15 vjet, ndërsa periudha e grejsit arrin deri në 3 vjet, njoftoi Ministria e Financave.