Komisionerja Kos, gjatë një konference shtypi me kryeministrin Hristijan Mickoski, inkurajoi qeverinë të nisë procesin e miratimit të këtyre ndryshimeve. Ajo theksoi se ekzistojnë mundësi serioze që deri në vitin 2028 një vend i Ballkanit Perëndimor të bëhet anëtar i BE-së, ku Maqedonia e Veriut ka vendin e saj.
Reformat për një ekonomi më të zhvilluar dhe standard më të mirë jetese janë thelbësore për procesin e anëtarësimit. Kos përshëndeti angazhimin e qeverisë në zbatimin e reformave, duke theksuar progresin inkurajues. Megjithatë, ajo përsëriti se miratimi i ndryshimeve kushtetuese është hapi i domosdoshëm për fillimin formal të negociatave të anëtarësimit.
E pyetur mbi ndërtimin e besimit me shtetet fqinje, Kos u përgjigj se nuk ka receta, por theksoi rëndësinë e besimit për përparimin në procesin e anëtarësimit. Besimi, sipas saj, ndërtohet me vepra të mira, duke shmangur tensionet, duke respektuar të drejtën ndërkombëtare dhe zgjidhjen paqësore të mosmarrëveshjeve.
Komisionerja evropiane përmendi përfitimet aktuale nga afrimi me BE-në, si negociatat për heqjen e roamingut, programet “Erasmus Plus”, dhe qasjen në iniciativa të inteligjencës artificiale e shëndetësisë. Ajo shtoi se anëtarësimi i plotë do të sjellë edhe më shumë përfitime.
Kos theksoi gjithashtu nevojën për një konsensus ndërpartiak për Kodin Zgjedhor, duke shpresuar se kjo do të ndodhë në interes të shtetit dhe për të përshpejtuar negociatat e anëtarësimit.
Kryeministri Mickoski tha se pret që integrimi evropian të mbetet i bazuar në kritere të qarta, vlera dhe përmbushjen e obligimeve reformuese, jo i ngarkuar me çështje dypalëshe që krijojnë pasiguri. Ai vlerësoi vizitën e Kos si një mundësi për bisedë të hapur mbi perspektivën evropiane të vendit dhe reformat e zbatuara.
Maqedonia e Veriut mbetet e bllokuar në rrugëtimin drejt BE-së për shkak të mosmarrëveshjes me Bullgarinë. Ndryshimet kushtetuese përfshijnë shtimin e bullgarëve dhe etnive të tjera në Kushtetutë dhe kërkojnë shumicë prej dy të tretash. Negociatat me BE-në nuk do të fillojnë pa këto ndryshime. Qeveria aktuale ka deklaruar se nuk do t'i bëjë këto ndryshime.