Marjana Koçeku, deputete e pavarur, ka deklaruar se është vënë në shënjestër të një fushate sulmesh në rrjetet sociale. Ky reagim vjen pas largimit të saj nga Partia Socialiste dhe vendimit për të vijuar mandatin si deputete e pavarur.
Koçeku shprehet se po përballet me profile të rreme, të cilat i kërkojnë të dorëzojë mandatin, por ajo nuk ka ndërmend të tërhiqet nga ky pozicion. Ajo pretendon se pas këtyre sulmeve fshihet një “ushtri virtuale patronazhistësh”, e lidhur me funksionarë të administratës shtetërore.
Deputetja thekson se bashkitë janë shndërruar në qendra koordinimi për këto profile, të cilat ushtrojnë presion ndaj zërave kritikë të qeverisë. Koçeku shtoi se nuk do t'i hapë rrugë “të keqes” dhe se pavarësia e saj në parlament po denigrohet.