Grupi parlamentar i Lidhjes Demokratike të Kosovës (LDK) në Kuvendin Komunal të Fushë Kosovës lëshoi mbledhjen në shenjë proteste. LDK akuzoi ekzekutivin dhe kryesuesin e Kuvendit Komunal për përdorim të gjuhës së papranueshme. Vendimi u mor pas përfundimit të pikës së dytë të rendit të ditës.
LDK theksoi se anëtarët e saj nuk përdorën gjuhë ofenduese apo linçuese. Çdo diskutim, sipas tyre, u zhvillua brenda gjuhës parlamentare, i argumentuar me fakte dhe në respekt të institucionit. Kjo parti deklaroi se nuk do të tolerojë linçime apo sulme ndaj anëtarëve të saj dhe kërkon që debati politik të mbetet brenda kufijve institucionalë.
Në anën tjetër, kryesuesi i Kuvendit Komunal të Fushë Kosovës, Vlonjat Hasani, mohoi akuzat. Ai deklaroi se qëllimi i tij ishte ruajtja e rendit dhe respektimi i rregullave të punës së Kuvendit. Hasani theksoi se askush nuk ka përdorur gjuhë të papranueshme. Kërkesat e tij gjatë seancës kishin për qëllim funksionimin normal të Kuvendit dhe respektimin e rregullave procedurale. Hasani shtoi se do të jetë këmbëngulës në kërkesën për respektimin e rregullave, rendit dhe profesionalizmit në Kuvend, si dhe rëndësinë e respektimit të institucionit të kryesuesit.