Ministri i Brendshëm i Shqipërisë, Besfort Lamallari, deklaroi se shpallja “non grata” e Igballe Berishës nuk do të jetë rast i izoluar. Ai paralajmëroi masa të ngjashme për persona jo-shtetas shqiptarë që përpiqen të ndikojnë në agjenda kundër interesave dhe rrugës evropiane të Shqipërisë.
Deputeti i VLEN-it, Adnan Azizi, reagoi ndaj zhvillimeve politike në Shqipëri, duke akuzuar BDI-në për propagandë dhe etiketime politike. Azizi lidhi këto akuza edhe me institucionet shqiptare. Koha e reagimit të Azizit, pothuajse njëkohësisht me deklaratën e Lamallarit, ka ngritur debate publike rreth kontekstit të përfshirjes së tij.
Deri më tani, nuk ka asnjë deklaratë zyrtare që lidh deputetin Azizi me ndonjë procedurë “non grata”. Megjithatë, paralajmërimi i Lamallarit ka rikthyer në vëmendje çështjen e ndikimit të aktorëve politikë të jashtëm në debatet e brendshme të Shqipërisë.