Zoran Pashaliç, Avokati i Popullit i Serbisë, i ka bërë thirrje autoriteteve gjyqësore të zbardhin rrethanat e vendosjes së posterëve me gjuhë urrejtjeje ndaj pakicës kombëtare shqiptare në Krushevc. Pashaliç kërkon identifikimin dhe dënimin e përgjegjësve, si dhe marrjen e masave parandaluese për raste të ngjashme në të ardhmen.
Këto kërkesa vijnë pas shfaqjes së mesazheve urrejtjeje pranë një furre buke në pronësi të shqiptarëve në Krushevc. Posterët përmbanin thirrje për qytetarët që të kujtonin Gazimestanin dhe të mos blinin nga shqiptarët. Avokati i Popullit theksoi se veprime të tilla përbëjnë shprehje të papranueshme të mosdurimit dhe diskriminimit, duke rrezikuar sigurinë e qytetarëve dhe dëmtuar besimin ndërkomunitar.
Sipas Pashaliçit, shteti duhet të mbrojë në mënyrë të barabartë të drejtat e të gjitha pakicave kombëtare dhe të veprojë me vendosmëri ndaj diskriminimit, gjuhës së urrejtjes dhe nxitjes së urrejtjes etnike. Ai shtoi se përhapja e urrejtjes nuk ka vend në një shoqëri demokratike, duke garantuar të drejtën e çdo qytetari për të jetuar pa frikë nga diskriminimi. Po ashtu, Lëvizja e Qytetarëve të Lirë (PSG) kërkoi hetim nga policia dhe prokuroria, duke theksuar rrezikshmërinë e shënjestrimit të individëve për shkak të përkatësisë kombëtare.