Agjencia e Statistikave të Kosovës (ASK) publikoi statistikat afatshkurtra të shërbimeve për majin 2026. Të dhënat tregojnë një rritje prej 4.42 për qind në numrin e të punësuarve në sektorët e shërbimeve. Rritja e punësimit u vërejt në të gjitha aktivitetet e përfshira.
Sektori i bar-restoranteve shënoi rritjen më të madhe të punësimit, me 5.84 për qind. Pasojnë veprimtaritë profesionale, shkencore dhe teknike me 5.65 për qind. Veprimtaritë botuese, prodhimi audio-vizual, transmetimi, telekomunikimi, programimi kompjuterik dhe shërbimet e informacionit regjistruan një rritje prej 4.63 për qind.
Fondi i pagave dhe mëditjeve në sektorët e shërbimeve u rrit me 16.43 për qind në maj 2026 krahasuar me majin 2025. Edhe këtu, sektori i bar-restoranteve shënoi rritjen më të madhe të fondit të pagave me 22.49 për qind. Veprimtaritë profesionale, shkencore dhe teknike shënuan rritje me 16.42 për qind, ndërsa veprimtaritë administrative dhe mbështetëse me 16.29 për qind.
Megjithatë, indeksi i qarkullimit në sektorët e shërbimeve ra me 4.68 për qind në maj 2026. Rënie e qarkullimit u regjistrua në hotele me 1.55 për qind, bar-restorante me 2.82 për qind, transport dhe magazinim me 3.25 për qind, si dhe veprimtari administrative dhe mbështetëse me 21.81 për qind. Rritje qarkullimi patën aktivitetet profesionale, shkencore dhe teknike me 3.67 për qind, si dhe veprimtaritë botuese, prodhimi audio-vizual, transmetimi, telekomunikimi, programimi kompjuterik dhe shërbimet e informacionit me 3.46 për qind.