OBRM-PDUKM pret rregullimin e votimit me postë për diasporën në Komisionin Shtetëror Zgjedhor (KSHZ) deri më 30 shtator 2028, duke shprehur gatishmërinë të pranojë një njësi zgjedhore.
Nga ana tjetër, “E Majta” kërkon që financimi shtetëror për reklamat zgjedhore të jetë 10% për partitë me grupe parlamentare dhe vendimmarrja në KSHZ të jetë konsensuale. Ky propozim refuzohet nga OBRM-PDUKM.
Rreth 13,500 amendamente janë paraqitur nga LSDM dhe “E Majta” për ndryshimet në Kodin Zgjedhor. Propozimi për votimin elektronik të diasporës mbeti pika më e diskutueshme. LSDM e ka refuzuar këtë propozim për shkak të shqetësimeve mbi sigurinë, transparencën dhe mbrojtjen e vullnetit zgjedhor, megjithëse nuk kundërshton votimin e diasporës në parim. “E Majta” e pranoi votimin elektronik me kushtin e rritjes së përqindjes për reklamat politike të paguara.
Një marrëveshje paraprake është arritur mes BDI-së dhe “E Majtës” lidhur me financimin buxhetor të partive për zgjedhjet. Sipas kësaj, raporti i numrit të deputetëve do të jetë kriter objektiv për shpërndarjen e 97% të fondeve, ndërsa 3% do t’u shkojnë partive pa deputetë. Konkretisht, 42% do të ndahen për dy partitë më të mëdha në pushtet, 42% për dy partitë më të mëdha opozitare, 8% për partitë me grupe parlamentare, 5% për partitë pa grupe parlamentare dhe 3% për partitë dhe grupet e votuesve jashtëparlamentarë.
Nëse palët arrijnë një marrëveshje në Kuvend, LSDM dhe “E Majta” do të tërheqin amendamentet, duke zhbllokuar procesin. Ndryshimet në Kodin Zgjedhor janë pjesë e pikave të reformës për vendin.