Aktivistja Sidorela Vatnikaj deklaroi se Komiteti Shqiptar i Helsinkit ka konstatuar dhunë joproporcionale nga policia gjatë protestave antiqeveritare. Ajo theksoi se protesta është e drejtë kushtetuese dhe çdo përpjekje për frikësim ose shtypje përbën shkelje të kësaj të drejte themelore.
Vatnikaj dënoi përdorimin e gazit pa paralajmërim dhe shtyrjen e protestuesve. Ajo kërkoi nga policia të japë shpjegime dhe të mundësojë një hetim të pavarur për tejkalimin e kompetencave. Sipas saj, çdo efektiv policie duhet të mbajë përgjegjësi për veprimet e tij.
Aktivistja shtoi se dhuna e ushtruar ndaj protestuesve nuk ishte rast i izoluar. Ajo kërkoi lirimin e menjëhershëm të personave të ndaluar, duke theksuar se ndalimet arbitrare dhe dhuna nuk mund të përdoren si mjet frikësimi.