Kryeministri Edi Rama reagoi ndaj kritikave për akordimin e 4 milionë eurove nga fondi rezervë i shtetit për organizimin e koncertit të Kanye West. Vendimin ai e quajti të domosdoshëm, duke theksuar se shmangte dëmtimin e imazhit të Shqipërisë dhe garantonte zhvillimin e aktivitetit.
Rama theksoi se fondi u përdor në “minutën e fundit” për të mos turpëruar vendin përballë 25 mijë vizitorëve nga 80 shtete që kishin blerë bileta. Ai mbrojti zgjedhjen, duke theksuar mundësinë për promovimin e turizmit dhe përfitimet ekonomike, të vlerësuara në rreth 100 milionë euro të ardhura.
Kryeministri adresoi gjithashtu kritikat se paratë mund të ishin përdorur në shëndetësi. Ai theksoi investimet e fundit, përfshirë 15 milionë euro për ilaçet e të sëmurëve me kancer dhe 5 milionë euro për aparatura mjekësore. U përmend edhe dyfishimi i mbështetjes për personat me aftësi të kufizuar, fëmijët me nevoja të veçanta dhe financimi i start-up-eve, si dhe bonusi për pensionistët.
Njëkohësisht, Rama sulmoi ashpër protestuesit, duke i quajtur “sorra dhe korba”. Ai akuzoi se ata po manipulojnë opinionin publik dhe po përdorin protestën qytetare për interesa politike. Sipas Ramës, ata që kanë “privatizuar protestën qytetare” synojnë të ndalin zhvillimin e vendit. Ai theksoi se Shqipëria “nuk ndalet dhe nuk ka asnjë shans të kthehet mbrapsht”.