Artikulli i “Il Foglio” e përshkruan Shqipërinë si një vend ku zemërimi publik ndaj korrupsionit, ndërtimeve të pakontrolluara, mungesës së transparencës dhe kapjes së institucioneve ka bashkuar mijëra qytetarë. Kjo lëvizje, e quajtur “Revolucioni i Flamingove”, ka kapërcyer ndarjet politike dhe kërkon mbrojtjen e identitetit, të ardhmes dhe demokracisë së vendit.

Protestat nisën në fund të majit, kur punimet arritën në zonën e mbrojtur pranë Zvërnecit, Vlorë, ku dyshohet se Jared Kushner planifikon një resort luksoz. Pas shpërthimit të protestës dhe përhapjes së një videoje ku një manifestues dëbohet dhunshëm, zemërimi u rrit. Që atëherë, sheshet janë mbushur me qytetarë që kërkojnë largimin e kryeministrit Rama, duke e konsideruar atë përgjegjës për ekspozimin e vendit ndaj 'peshkaqenëve' financiarë.

Fatma Paja, një dizajnere 28-vjeçare dhe autore e simbolit të flamingos rozë, ka deklaruar për “Il Foglio” se nuk është kundër investimeve të huaja, por kundër mënyrës së menaxhimit të tyre, pa transparencë dhe pa respekt për natyrën. Ajo theksoi se resortet luksoze shërbejnë oligarkët dhe jo shqiptarët e thjeshtë. Edhe pse Rama ka një imazh ndërkombëtar si modernizator, analistët shprehen të befasuar nga kjo revoltë, duke e cilësuar atë si rezultat i një marketingu politik të dështuar. Blendi Kajsiu, politolog, e cilëson këtë si një protestë kundër klasës politike në tërësi, e nxitur edhe nga puna e SPAK-ut.

Lajdi Sulaj, arkitekt dhe pedagog universitar, thekson se Shqipëria po kopjon modelin më të keq të ndërtimeve nga Italia e viteve '60-'70, ku investimet private po rrisin çmimet e pronave dhe po ulin mundësinë e blerjes së shtëpive nga shqiptarët. Bashkimi Europian ka kërkuar shfuqizimin e ligjit për investimet strategjike, i cili favorizon investimet e huaja pa vlerësim ndikimi mjedisor dhe me kontrolle të reduktuara. Refuzimi për ta bërë këtë mund të bllokojë negociatat teknike për anëtarësimin në BE.

Përballë kësaj situate, ish-ministri i Jashtëm Ditmir Bushati theksoi nevojën për reflektim serioz, duke kritikuar qasjen e kryeministrit që injoron thelbin e zemërimit popullor. Rama, pasi fillimisht e injoroi protestën, më pas e akuzoi atë si të nxitur nga forca të huaja, por më vonë u përball edhe me presionin e brendshëm pas pezullimit të zëvendëskryeministres Belinda Balluku, ku u detyrua të tërhiqej.