Hapet konkursi për Shkollën e Mesme të Policisë “7 Maji”

Ministria e Brendshme ka hapur konkursin për regjistrim në Shkollën e Mesme të Policisë “7 Maji”. Aplikimi u drejtohet nxënësve që kanë përfunduar vitin e dytë të arsimit të mesëm, të cilët pas diplomimit do të punësohen si oficerë policie.

Shkolla e re e Policisë, e krijuar me vendim të Qeverisë dhe Ligjit për Shkollën e Mesme të Policisë, do të pranojë nxënës që kanë përfunduar vitin e dytë të arsimit të mesëm katërvjeçar. Nxënësit do të ndjekin mësime profesionale dhe të përgjithshme, si dhe do të akomodohen në konviktin e Qendrës së Trajnimit të MPB-së në Idrizovë, një vend ku janë shkolluar breza oficerësh policie.

Konkursi është i hapur nga 3 korriku dhe zgjat 15 ditë. Aplikantët duhet të plotësojnë kërkesat e konkursit dhe të kalojnë një proces përzgjedhjeje me tre faza: test aftësish motorike, test me shkrim të arsimit të përgjithshëm dhe intervistë individuale.

Ndihmësministri në Qendrën e Trajnimit të MPB-së, Vlatko Mitkovski, deklaroi se procesi i përzgjedhjes pritet të përfundojë rreth mesit të gushtit. Synohet të plotësohen dyqind vende. Komisioni vlerësues do të përbëhet nga një kryetar dhe të paktën katër anëtarë, bashkë me zëvendësit e tyre nga njësitë përkatëse organizative të Ministrisë.