Kryeministri britanik, Keir Starmer, do të mbledhë rreth dymbëdhjetë partnerë evropianë për të nisur bashkëpunimin në zhvillimin e këtyre kapaciteteve të reja ushtarake. Qeveria britanike bëri të ditur se fondi prej 50 miliardë dollarësh do të shfrytëzohet për sisteme moderne goditëse, të afta të godasin objektiva mbi 300 kilometra larg, dhe në disa raste, deri në 2 mijë kilometra, me saktësi të lartë.
Kjo nismë synon forcimin e aftësive mbrojtëse dhe parandaluese të NATO-s. Njëkohësisht, do të rrisë bashkëpunimin industrial dhe teknologjik ndërmjet vendeve evropiane. Londra thekson se ky investim do t'i mundësojë Evropës zhvillimin e armëve të gjeneratës së ardhshme dhe një rol më të madh në sigurinë e Aleancës.
Mbretëria e Bashkuar ka angazhuar tashmë 3 miliardë paund deri në vitin 2030 për zhvillimin e kapaciteteve të saj të goditjes me rreze të gjatë. Brenda kësaj nisme, Britania do të bashkëpunojë me Gjermaninë, Francën dhe Italinë në projekte për zhvillimin e raketave hipersonike dhe sistemeve të avancuara të sulmit.
Kryeministri Starmer deklaroi se një NATO më e fortë, me një rol më të madh evropian, është thelbësore për sigurinë e kontinentit. Ai theksoi se lufta në Ukrainë ka dëshmuar rëndësinë vendimtare të armëve me rreze të gjatë në fushën e betejës. Programi do ta vendosë zhvillimin e kapaciteteve të goditjes precize në qendër të agjendës së NATO-s gjatë vitit të ardhshëm, me qëllim rritjen e aftësisë së aleancës për t'iu përgjigjur kërcënimeve të ardhshme.