Tineke Strik, eurodeputetja holandeze, mbajti një fjalim kritik në Parlamentin Europian, ku ngriti shqetësime serioze lidhur me situatën në Shqipëri. Ajo theksoi dy çështje kryesore: dëmet e rënda mjedisore në zonën e Vjosë-Nartës dhe mbrojtjen politike që Kuvendi i Shqipërisë i bëri ish-zëvendëskryeministres Belinda Balluku, duke refuzuar kërkesën e SPAK për heqjen e imunitetit.
Strik, e cila vizitoi Shqipërinë pak javë më parë, vuri në dukje dëmet e shkaktuara nga një rrugë 7 km e gjatë, e ndërtuar përmes dunave dhe tharja e ligatinave në Vjosë-Nartë. Ajo e cilësoi si “të pakuptueshme” dhënien e lejeve të zhvillimit përpara vlerësimit të ndikimit në mjedis dhe kritikoi Kryeministrin për vazhdimin e projektit. Parlamenti Europian ka miratuar një amendament që kërkon shfuqizimin e ligjit aktual dhe vendosjen e një moratoriumi, pasi kjo situatë rrezikon negociatat e anëtarësimit të Shqipërisë në BE.
Për çështjen e drejtësisë, eurodeputetja vlerësoi pavarësinë e SPAK, duke e konsideruar një sukses të reformës në drejtësi. Megjithatë, ajo i bëri thirrje urgjente Parlamentit shqiptar të ndalojë mbrojtjen politike ndaj zyrtarëve. Strik përmendi konkretisht refuzimin e Kuvendit për të hequr imunitetin e Belinda Ballukut, për të cilën SPAK ka kërkuar hetim në dy raste korrupsioni. Ajo kërkoi që Parlamenti të zhbëjë këtë vendim, të lehtësojë hetimet dhe të lejojë drejtësinë të funksionojë lirshëm.