Drejtori i Klinikës Universitare për Sëmundje Infektive dhe Gjendje Febrile, Fadil Cana, njoftoi për dy raste të konfirmuara laboratorikisht të etheve të Nilit Perëndimor. Të dy pacientët janë hospitalizuar dhe ndodhen nën mbikëqyrje të vazhdueshme mjekësore. Ata po trajtohen sipas rekomandimeve bashkëkohore, dhe gjendja shëndetësore monitorohet me kujdes.
Ethet e Nilit Perëndimor janë një sëmundje virale që transmetohet përmes pickimit të mushkonjave të infektuara. Shumica e personave të infektuar nuk shfaqin simptoma ose kanë simptoma të lehta. Megjithatë, një numër i vogël pacientësh, sidomos të moshuarit dhe ata me imunitet të dobësuar, mund të zhvillojnë komplikime neurologjike më të rënda.
Klinika u bën thirrje qytetarëve të respektojnë masat mbrojtëse kundër mushkonjave. Këto masa përfshijnë përdorimin e repelentëve, veshjen e rrobave me mëngë të gjata dhe pantallonave kur janë jashtë, vendosjen e rrjetave mbrojtëse në dritare dhe largimin e ujit të ndenjur, i cili është terren për shumimin e mushkonjave.
Aktualisht nuk ka arsye për panik, por kërkohet kujdes i shtuar, veçanërisht gjatë verës kur aktiviteti i mushkonjave është më i lartë. Qytetarët që shfaqin temperaturë të lartë, dhimbje koke të forta, ngurtësim të qafës, vetëdije të dëmtuar ose simptoma të tjera neurologjike pas pickimit të mushkonjës, duhet të kërkojnë menjëherë ndihmë mjekësore. Klinika mbetet në koordinim me institucionet shëndetësore dhe po monitoron situatën epidemiologjike. Raste të etheve të Nilit Perëndimor janë regjistruar edhe në rajon këtë sezon, duke theksuar rëndësinë e diagnostikimit, mbikëqyrjes dhe masave parandaluese.