Mbappe po zhvillon një Kampionat Botëror mbresëlënës, duke shënuar shtatë gola në pesë ndeshje dhe ka udhëhequr Francën drejt çerekfinaleve. Goli i tij i fundit erdhi nga pika e bardhë në fitoren 1-0 ndaj Paraguait në fazën e 1/16-tës. Sulmuesi i Real Madridit numëron 19 gola në historinë e Kupës së Botës, vetëm një më pak se Lionel Messi, i cili mban rekordin me 20 realizime. Plot 11 prej golave të Mbappes janë shënuar në fazën eliminatore të turneut.
Pavarësisht paraqitjeve të jashtëzakonshme, 27-vjeçari vazhdon të jetë objekt kritikash. Disa pretendojnë se ai ka ndikim të tepruar si te Real Madridi, ashtu edhe te kombëtarja franceze. Gjatë Botërorit kanë qarkulluar në rrjetet sociale edhe imazhe që e paraqesin Mbappen si një “diktator”. Deschamps theksoi se kjo nuk përputhet me realitetin.
“Ju e paraqisni Kylian Mbappen si një diktator, por realiteti është krejtësisht i kundërt,” tha Deschamps. Ai shtoi se “Imazhi i tij publik nuk pasqyron aspak realitetin. Kylian ka qenë gjithmonë i pjekur dhe e gjithë skuadra e ndjek.” Trajneri shprehu kënaqësinë që ka Mbappen kapiten, duke theksuar se “Sa herë që ai flet, qoftë në fushë apo jashtë saj, ai përfaqëson të gjithë grupin.”
Mbappe aktualisht kryeson garën për “Këpucën e Artë” të Botërorit 2026 së bashku me Lionel Messin, me të dy që kanë realizuar nga shtatë gola deri tani në turne.