Ministrja e Financave, Gordana Dimitrieska-Koçoska, deklaroi se ribalanci nuk shkaktohet nga mungesa e të ardhurave, por nga nevoja për të rregulluar buxhetin. Sipas saj, do të sigurohen mjete për pagesa të rregullta pagash, mbështetje për bujqësinë, mbrojtjen sociale dhe komunitetet lokale, si dhe për përshpejtimin e investimeve.
Të ardhurat totale të rishikuara janë 379,5 miliardë denarë, me të ardhura tatimore në nivelin e planifikuar fillimisht prej 213,2 miliardë denarë. Të ardhurat jotatimore janë përmirësuar me pothuajse dy miliardë denarë, ndërsa donacionet janë rritur me rreth 2,7 miliardë denarë.
Shpenzimet totale janë rishikuar në 425,8 miliardë denarë. Janë siguruar fonde shtesë për subvencione bujqësore, duke arritur në 8,7 miliardë denarë, si dhe për transportin hekurudhor dhe mbështetjen e sportit e studentëve. Një ulje prej rreth 837 milionë denarë bëhet në shpenzimet për mallra dhe shërbime, ndërsa investimet kapitale rriten me 5,8 miliardë denarë, duke arritur pothuajse 46 miliardë denarë.
Ministrja theksoi se korrigjimi i deficitit, i cili arrin 46,3 miliardë denarë ose 4,1% e PBB-së, është rezultat i shpenzimeve më të larta kapitale dhe investimeve në infrastrukturë. Debati i Komisionit Parlamentar për Financim dhe Buxhet do të zgjasë 10 ditë.