Zëdhënësja e Qeverisë, Marija Miteva, njoftoi se ky vendim u mor gjatë seancës së fundit qeveritare. Informacioni i paraqitur nga Ministria e Vetëqeverisjes Lokale u shqyrtua dhe u miratua.
Paraprakisht, Kryetari i Këshillit të Komunës së Brvenicës kishte dërguar njoftim për krijimin e një baze ligjore për ndërprerjen e parakohshme të mandatit. Ministria e Vetëqeverisjes Lokale ka nisur procedurën në përputhje me detyrimet ligjore, pas rrethanës që, sipas Ligjit për Vetëqeverisjen Lokale, sjell ndërprerjen e mandatit me forcën e ligjit.
Miteva theksoi se Ministria duhet të informojë Qeverinë brenda 15 ditëve nga marrja e njoftimit. Më pas, Qeveria ka afat 30-ditor për të nisur procedurën për shpalljen e zgjedhjeve të reja për kryetar komune. Miratimi i këtij vendimi krijon parakushtet ligjore për zbatimin e procedurës së mëtejshme, duke respektuar rregulloret dhe afatet në fuqi.