Kos, gjatë një konference të përbashkët shtypi me kryeministrin Hristijan Mickoski, inkurajoi qeverinë të nisë procesin për këto ndryshime. Ajo shtoi se reformat ekonomike dhe ato që përmirësojnë standardin e jetesës janë thelbësore për procesin e anëtarësimit. Komisionerja vlerësoi progresin inkurajues dhe angazhimin e qeverisë në zbatimin e reformave.
Ajo theksoi se BE-ja funksionon mbi bazën e besimit, duke përmendur se ndërtimi i tij kërkon veprime konkrete dhe shmangien e fjalëve që rrisin tensionet, si dhe zgjidhjen paqësore të mosmarrëveshjeve. Kos përsëriti se anëtarësimi i plotë do të sjellë përfitime të mëdha, ndërsa qytetarët tashmë po ndjejnë përfitimet nga afrimi me BE-në përmes heqjes së roamingut, programeve si Erasmus Plus, nismave për inteligjencën artificiale dhe shëndetësinë.
Gjithashtu, komisionerja theksoi nevojën për konsensus ndërpartiak rreth Kodit Zgjedhor, duke besuar se kjo do të përshpejtojë negociatat e anëtarësimit. Kryeministri Mickoski shprehu pritshmërinë që integrimi evropian të mbetet një proces i bazuar në kritere të qarta dhe vlera, jo i ngarkuar me çështje dypalëshe.
Maqedonia e Veriut filloi bisedimet qasëse me BE-në në korrik 2022, pas miratimit të propozimit francez, i cili përfshin kushtin e ndryshimeve kushtetuese për përfshirjen e bullgarëve dhe etnive të tjera në Kushtetutë. Qeveria aktuale ka deklaruar se nuk do t’i kryejë këto ndryshime, të cilat kërkojnë shumicë prej dy të tretash në Kuvend.