BDI kërkon një njësi zgjedhore, lista të hapura dhe prag 5%

Bashkimi Demokratik për Integrim (BDI) mbetet në qëndrimin për një njësi zgjedhore, me lista të hapura për deputetët dhe prag zgjedhor 5%. Këtë e theksoi koordinatorja e grupit parlamentar të "Frontit Evropian", Rina Ajdari, pas dështimit të bisedimeve për Kodin Zgjedhor në Kuvend.

Ajdari informoi se bisedimet për ndryshimet në Kodin Zgjedhor dështuan për shkak të tërheqjes së disa partive politike nga marrëveshjet paraprake. BDI ka qenë pjesë aktive e grupit të punës për muaj të tërë, ku u arritën kompromise për çështje kyçe.

Ajo shtoi se pas dorëzimit të propozimit të dakorduar në Kuvend, VMRO-DPMNE u tërhoq nga dy pika thelbësore. E para, kërkesa për votim me postë për diasporën në vend të votimit elektronik. E dyta, kërkesa që rregulloret e Komisionit Shtetëror të Zgjedhjeve (KSHZ) për votimin elektronik të diasporës të miratohen me shumicë votash, në vend të konsensusit.

Për BDI-në, këto ndryshime janë të papranueshme, pasi hapin hapësirë për inxhinieri politike dhe mbivotim, siç sipas saj ndodhi në vitin 2024 me anëtaren e KSHZ-së, Ditmire Shehu. Ajdari theksoi se çdo ndryshim i Kodit Zgjedhor kërkon konsensus ndëretnik dhe ndërpartiak, duke theksuar se BDI nuk do të pranojë zgjidhje të njëanshme që shkelin barazinë politike dhe besimin në procesin zgjedhor.