Kreu i Grupit Parlamentar të PD-së, Gazment Bardhi, deklaroi se Kuvendi i Shqipërisë është kthyer në një noter të vendimeve të ekzekutivit, duke humbur funksionin e kontrollit dhe mbikëqyrjes së qeverisë. Ai kritikoi refuzimin e mazhorancës për të debatuar Rezolutën e Parlamentit Europian për Shqipërinë.
Bardhi theksoi se Parlamenti shqiptar nuk udhëheq procesin e integrimit europian. Sipas tij, Kuvendi nuk merr nisma ligjvënëse, nuk siguron llogaridhënie të qeverisë dhe nuk ushtron kontroll e mbikëqyrje efektive. Gjithashtu, ai përmendi se mazhoranca pengoi heqjen e imunitetit të zëvendëskryeministres Belinda Balluku, pas kërkesës së SPAK për akuzat e paracaktimit të tenderave, korrupsionit dhe pastrimit të parave.
Ai shtoi se mbrojtja politike e zyrtarëve të lartë të akuzuar për korrupsion vështirëson integrimin. Bardhi argumentoi se një Parlament që nuk ushtron funksionet kushtetuese nuk mund të quhet i tillë në kuptimin europian, duke theksuar se Shqipëria ka nevojë për një Parlament funksional për një proces integrimi më të shpejtë dhe të besueshëm.