Kujtim Kërveshi, avokat, deklaroi se ka pranuar mbrojtjen ligjore të Bekim Metajt. Avokati theksoi se e drejta për mbrojtje është një shtyllë themelore e shtetit të së drejtës. Ai shtoi se çdo individ ka të drejtë të përfaqësohet me profesionalizëm, pavarësisht natyrës së akuzave apo debatit publik.
Kërveshi vuri në dukje se, përveç përgjegjësisë profesionale, ndihet i detyruar moralisht të ofrojë ndihmë ligjore, duke pasur parasysh kontributin e Metajt si pjesëtar i Ushtrisë Çlirimtare të Kosovës gjatë luftës. Mbrojtja do të bëhet brenda kornizës ligjore, me respekt të plotë për institucionet e drejtësisë dhe të drejtat e palëve.
Avokati u shpreh i bindur se provat do të dëshmojnë që Metaj është sulmuar dhe ka vepruar në vetëmbrojtje për të shmangur rrezikun, nga një sulm i kryer nga më shumë se 20 persona. Kërveshi u kërkoi mediave dhe publikut të tregojnë maturi, të respektojnë prezumimin e pafajësisë dhe të lejojnë drejtësinë të bëjë punën e saj.